ហេតុការណ៍បានកើតឡើងនៅលើផ្លូវជាតិលេខ៦ ស្ថិតនៅក្នុងសង្កាត់ស្វាយដង្គំ ក្រុងសៀមរាប នៅវេលាម៉ោងជិត 12 ថ្ងៃត្រង់ នាថ្ងៃទី 5 ខែតុលា ឆ្នាំ 2024 ចំណុចមុខផ្សារទំនើបអង្គរ។ នេះបើតាមទីភ្នាក់ងារសារព័ត៌មាន សៀមរាប ប៉ុស្តិ៍ ធ្វើសេចក្ដីរាយការណ៍ ព័ត៌មានបឋម។
សេចក្ដីរាយការណ៍បានឱ្យដឹងថា រថយន្តស៊េរីទំនើបដែលជួបហេតុការណ៍គ្រោះថ្នាក់ចរាចរណ៍នេះ ពណ៌ខ្មៅពាក់ផ្លាកលេខភ្នំពេញ 2BZ-9027 បើកបរដោយស្ត្រីម្នាក់ ពីរលិចមកកើត ក៏បានបុកម៉ូតូម៉ាកហុងដាពណ៌ខ្មៅពាក់ផ្លាកលេខសៀមរាប 1Q-934 ដែលបើកដោយបុរសម្នាក់តែម្ដង។
សេចក្សីរាយការណ៍បានបន្ថែមថាបុរសអ្នកបើកម៉ូតូមានឈ្មោះ រុន សុផារិទ្ធ អាយុ៣៩ឆ្នាំមុខបរបោកអ៊ុត។ ចំណែកអ្នកបររថយន្តជាស្ត្រី ទាន់ស្គាល់អត្តសញ្ញាណនៅឡើយ។
វត្ថុតាងរថយន្តនិងម៉ូតូត្រូវបានជំនាញនគរបាលចរាចរណ៍យកទៅរក្សាទុកនៅកន្លែងចរាចរណ៍ផ្លូវគោក។ ពាក់ព័ន្ធករណីគ្រោះថ្នាក់ចរាចរណ៍នេះ ទីភ្នាក់ងារសារព័ត៌មាន សៀមរាប ប៉ុស្តិ៍ នៅពុំទាន់ទទួលព័ត៌មានលម្អិតពីជំនាញនៅឡើយរហូតដល់ម៉ោងផ្សាយនេះ៕
